Osnovna škola Zamet Rijeka

Koliko let već zvončari pohajaju po Zamete i kako su obučeni? Ča je zvončarsko kolo? Ki je kapo od zvončari? Naši prvašići i drugašići z oduševljenjen su naslišali štoriju od Zametskeh zvončari.

Predstavnici zametskeh zvončari prišli su nan va razred. Šjor Željko Monjac povedel nan je celu štoriju od Zametskeh zvončari. Oni postoje od 1971. leta, od Antonji do Pepelnice pohajaju po Zamete i okolneh mesteh va našemu kraju. Zametski zvončar obučen je va bele brageše s črjenun rigun i mornarsku maju, okol vrata je črjeni facol, a preko škine nosi ovčju kožu. Na glave ima kot kacigu z ovčjun kožun i dva roga, na nogah nosi kopice i črni postoli. V' ruke nosi mačuku, a zada je veli zvonac. Zvončari hode onako kako njin reče kapo, ili gredu jedan za drugen ili dva zvončara tuču zvonci med sobun, a najlepše je kada store velo zvončarsko kolo. Deca su z oduševljenjen naslišala štoriju, a cela škola je čula kako tuku zvonci. Najmlaji članovi Zametskeh zvončari nan garantiraju da se ova lepa užanca nikada neće zatrt.